高比拜仁在明星賽被韋迪打傷鼻即時「見紅」，但佢賽後就以頭痛為由缺席記招，惹來不少記者不滿。《雅虎體育》昨日報道，原來高比仔唔單只鼻骨骨折，仲驗出有輕微腦震盪，大有機會缺席明早對木狼嘅賽事。
（周四早上11時30分開賽）
據《雅虎體育》透露，高比仔於明星賽後返回洛杉磯檢查傷勢，結果發現有輕微腦震盪，不過湖人卻未有公布此消息。
高比因為明星賽而受傷，「兇手」韋迪及西岸教練史葛布魯克斯都因而備受抨擊，但後者解釋因為明白高比想比賽先畀佢帶傷落場。
周身傷諗過退休
其實高比仔近年可謂「周身傷」，手指、足踝及膝蓋嘅傷患經常困擾住佢，據ＭＬＢ紐約洋基棒球手洛迪古斯指出，高比仔在上季曾因足踝傷患而萌生退休念頭。