林書豪人氣蓋高比，「錢途」超越「小飛俠」同「大帝」！林書豪早前在球場上已砌低高比拜仁，估唔到場外一樣食住「小飛俠」！兩大球星尋日一同出席贊助商在奧蘭多舉行嘅活動，林書豪獲得大批粉絲逼爆撐場，反觀「過氣高比」大受冷落，風頭全被「林瘋」蓋過。而一項調查亦顯示，J.Lin嘅市場價值，亦超過高比同「大帝」兩大球星。
林書豪同高比嘅贊助商在奧蘭多一家運動舖舉行活動，好讓球迷可以近距離接近偶像兼攞簽名。由於「林瘋」熱潮實在太勁，活動在中午12時舉行，但朝早9點已有球迷排隊。人氣爆燈嘅林書豪要在警察及保鏢護駕到場，但一線球星高比仔就冇呢個待遇，J.Lin甫到場已令門外數百粉絲喊破喉嚨，結果佢簽咗唔夠一個鐘就走人，搞到好多粉絲失望而回。
除人氣勝過高比外，據一間調查公司最新公布嘅一項指數（N-Score）顯示，林書豪嘅市場價值已超越高比拜仁及勒邦占士兩大球星。N-Score係一樣分析球員名聲、關注度、吸引力及個人形象嘅指數，J.Lin現時分數已經飆升至102分，超越90分嘅高比仔及84分嘅「大帝」。調查公司透露，有19%美國人聽過林書豪嘅名字，當中有30%表示欣賞佢。