如果林書豪係成功拯救紐約人嘅救星，新加盟嘅JR史密夫可能係摧毀球隊嘅炸彈。由於簽入多個NBA當打球員，中國CBA聯賽喺NBA停擺期間一度成為中港球迷嘅寵兒 ，只可惜呢班球員對CBA發展弊多於利，簡安馬田打咗十二場就被退貨，韋遜贊特拿同JR表現對辦，但隊友行行企企，球技未有進步。
唔好忘記呢班友扣番百萬「離隊費」，仲有至少百五萬美金落袋，呢份人工已經比王治郅年薪三百萬人仔多多倍，比中層球員年薪五十萬人仔豐厚好多。高薪請人坐鎮造成「貧富懸殊」並冇錯，但球隊戰績冇提升，亦無額外增加收入（零轉播收入，未有推出球星商品，全場爆滿全靠送票文化），咁請問請班友嚟有咩作用？
CBA犯咗錯，紐約人又再犯，錢對佢哋從來唔成問題，但簽個毒瘤返嚟？JR係可以提供一定嘅三分能力，但佢嗰種「我入係應該，唔入係隊友不該」嘅態度，唔得咯！
邱益忠