九旬翁眼疾求援保視力

由光明跌入黑暗世界的恐懼並非常人可以承受,長者尤甚。「我手腳健全,如果唔係對眼有事,我仲可以自己照顧自己!」九十二歲的黃華於十年前證實患有黃斑點退化,因一直無法支付醫療費而「死頂」。近日視力急轉直下,妻子更要常伴在側照顧起居。東方日報慈善基金了解後,為保病人僅餘視力,已撥款八千七百元以資助首期治療費用,惟日後治療費仍有賴善長慷慨捐輸。

黃伯與妻子居於西貢鄉郊,生活簡樸,平日最大娛樂便是不時到茶樓飲茶歎報紙,但近半年黃伯的視力急速衰退,歎報紙的日子早已不再,即使購買多個放大鏡亦難再享閱報樂趣。

上門探訪期間,黃伯即使走近記者身旁亦無法看清記者容貌,僅能辨識記者的衣着顏色,「我有時連顏色都分唔到,啲嘢會一時黃、一時綠。」黃坦言現時視力雖能辨認道路情況,惟乘搭巴士或小巴則必須要到總站乘搭,以免「睇錯路線上錯車」。

「連斟水都睇唔清」

黃又笑說自己的身體仍非常強健,視力正常時會經常四出閒逛。自從視力轉差後,雖然仍會外出,但行動就變得非常緩慢,要一步一步看清前路,「以前做咩都冇問題,但係依家連斟水都睇唔到幾時滿,真係好唔開心!」事實上,黃伯的聽覺衰退已久,現時連視力亦每況愈下,變成名副其實的「眼矇耳聾」,嚴重影響日常生活。

香港眼科醫院發言人證實,病人患有老年黃斑點退化,左、右眼均只餘下半成視力。醫生建議病人接受眼內注射「樂明晴」,每月注射一次,進行三次療程,合共費用約為港幣三萬六千元,而根據實際情況,完成療程後亦有可能需再次接受注射。

捐款編號:12214

記者:林永發 攝影:何穎賢

愛心回應

求助人︰姚文東

年齡︰18歲

求助物品︰輪椅及手提電腦

捐款編號︰12195

十八歲的姚文東(圖)先天患有大腦麻痹,影響雙腳活動能力,終生須靠輪椅代步。鑑於舉家生計僅靠父親一力支撐,阿東多年來一直只能借用學校宿舍之輪椅及電腦,但兩年已先後「坐爛咗三部輪椅,搞到我都唔好意思再借!」境況經報道後迅即獲善長捐助,購得全新輪椅及手提電腦並轉交阿東使用,「真係估唔到有咁多善長關心我,我一定會努力裝備自己,等第日可以回饋社會!」