林書豪 易建聯 命運大不同

交出雙雙砌低小牛

J.Lin魅力沒法擋，不單止獲保羅麥卡尼、活地亞倫及伊娃朗歌麗亞等歌影視紅星撐場，就連facebook創辦人朱克伯格亦專程到場一睹林書豪風采。結果這位美籍華裔球星不負眾望，造出「雙雙」，全場交出28分、兩項職業生涯新高的14次助攻及5次偷波，加上由CBA回歸的JR史密夫亦有15分進帳，終帶領紐約人以7分之差砌低來訪的小牛。

攻入全場最高34分的上屆MVP小牛球星魯域斯基，賽後大讚J.Lin的表現鼓舞人心，小牛班主古班則慨嘆未能簽入他是一大遺憾：「當年佢嚟過小牛訓練營，本來我想簽佢，奈何佢話想返家鄉金州打波。或者等我摷吓J.Lin着過嗰件小牛波衫，然後擺上ebay拍賣掠番筆。」

熱火炒魔術狙擊帝王

林書豪風光，易建聯就淒涼，昨仗雖被視為「亞洲打吡」，但「阿聯」就坐足全場，錄得今季第12次「齋坐」，這位中國球星於賽前練習時還笑笑口與J.Lin寒喧一番，但當記者走到更衣室追問對林書豪的睇法時，「阿聯」就似乎顯得不耐煩：「林書豪嘅努力已經得到回報，而我嘅努力就白費，都唔知做錯啲乜。不過打籃球始終係講整體，唔係一個人嘅事，佢同姚明邊個勁啲？唔同位點比較呀！」

另外，憑藉雙巨頭韋迪及勒邦占士合力貢獻52分，熱火昨晨輕鬆以90比78擊敗魔術，不過「大帝」就因為太投入，比賽期間向場邊觀眾席飛身救波，令一名小球迷捱撞兼變喊包，場面惹笑。熱火6連捷愈戰愈勇，明早有望延續強勢大炒帝王。