香港「女車神」李慧詩（Sarah）周日於世界盃英國站繼續大爆發，繼掛上爭先賽銅牌後，再於煞科日憑強勁衝刺力爆贏中國勁敵郭爽，首奪同為奧運項目的女子競輪賽銀牌，登上奧運列車近在咫尺！
「弗」到爆的Sarah，通過多輪預賽強勢晉級由六人爭逐的金牌戰，即使面對包括京奧冠軍英國彭迪爾頓、世界冠軍中國郭爽、澳洲美雅絲等強手，惟Sarah全無懼色，踩至最後一個衝刺圈更睇準機會由中路「爆出」，先過彭迪爾頓，再從內線頂開郭爽「飆」上次席，雖然最終以一個車位不敵立陶宛的古柏卡迪，但這面銀牌仍彌足珍貴，絕對是該位24歲女將單車生涯重大突破。
４站世界盃完結後，世界場地錦標賽將於４月４至８日假墨爾本舉行，成為港將搶分最後機會，倫奧資格也在４月下旬落實，不過港隊總教練沈金康已「事先張揚」：「李慧詩應該獲得競輪賽和爭先賽資格。」
Sarah由亞洲賽威到世界盃，作為「老大哥」的黃金寶最感安慰：「佢真係好犀利！自從贏得亞運金牌，信心提升，但喺香港始終冇咁多人陪練，佢可以話係開荒牛，乜都要靠自己，好唔容易！」阿寶更揚言她力足為港贏得第三件「彩虹戰衣」：「佢仲年輕，將來一定有機會揚威世界賽甚至奧運，不過唔希望大家畀太大壓力。」剛重奪亞洲賽金牌的阿寶，留港一天，今日返回廣州龍崗訓練基地，備戰下月的環台單車賽。