首位Big4受訓港人 何靖也英超小神童
港人愛英超，想做英超球星唔再局限於小學生「我的志願」嘅作文題材，因為已經有香港小將付諸實行！車路士足球學校（香港）最近推薦本地11歲足球天才何靖也Yahoo到英國，投身車路士青訓系統接受長期訓練，成為歷來首位到英超Big4球會受訓港人，而Yahoo亦已立定志向，大個仔要做英超球星！
現時足總青訓梯隊最年幼為U14，縱使「鳳凰計劃」出台後將增設U12，但幼年訓練工作仍須依賴坊間足球學校代辦，何靖也暫未在大型賽事亮相，然而其足球天分已深獲車路士技術總監山度士為首一眾青訓教練認同，山度士稱他為「全港11歲最好波」，車路士駐港足球課程發展經理Dave Stewart亦指Yahoo是可造之材，因此推薦他到英國車路士總部接受培訓。
度士激讚︰佢有我影子
何靖也之前就讀於加拿大國際學校，英語流利，去到英國在溝通上冇問題，他自幼跟隨前南華球星岑國培學習基本功，近年多次參加校隊、東方青年軍及車路士足球學校賽事，逐漸顯露其足球天分。
究竟Yahoo有何過人之處，山度士話呢位足球小將好有自己當年影子：「Yahoo係天生中場指揮官，好多時唔使我教，本身已具備睇通戰局能力，而且佢好好彩，車路士喺香港開足球學校，又畀我哋睇中，我當年就冇佢咁幸運嘞！希望佢去到英國後練番大隻啲，同埋搶波時唔好咁錫身，放膽啲，想做英超球星唔係得把口，一定要有真材實料。」
球技比同齡英童超班
Dave Stewart由車路士總部委派來港，連他都讚Yahoo有料到：「與英國11歲少年相比，Yahoo嘅球技可以用『超班』嚟形容，因此我鼓勵佢去英國受訓，雖然要踏入英超門檻仲要過好多難關，但至少Yahoo與同齡少年相比有一定優勢，容易令導師留下印象。」何靖也笑說：「自己最喜愛嘅英超球隊其實係阿仙奴，不過依家能夠加入同市死敵車路士受訓，心情一樣咁興奮。」
何靖也立志要做球星，其英文名亦由原本的Yaho改為Yahoo，令大家更容易記得佢。
圖/文︰黃兆崑