杜域侯活心淡諗轉公

【本報綜合報道】今季異軍突起嘅76人昨日打出一場爛仗，不過唔緊要，因為最近衰到貼地嘅魔術比佢哋更爛，又一次得分唔過「7字頭」，結果魔術輸69比74，一星期內打6場輸5場「肉酸敗仗」！目前魔術可謂毫無士氣可言，「魔獸」杜域侯活已經準備好隨時跳船，並毫不忌諱表態想做「毒玫瑰」戴歷羅斯拍檔，實行向公牛大送秋波。
杜域侯活（右）已經盡晒力，但奈何班隊友唔生性。（美聯社圖片）
杜域侯活（右）已經盡晒力，但奈何班隊友唔生性。（美聯社圖片）

渴望同戴歷羅斯拍檔

魔術今個星期可以話度過咗最黑暗嘅一周，從上個星期二開始作客塞爾特人可憐地取得56分，破咗多項恥辱性紀錄後，往後幾場波可謂衰開有條路。昨日場波亦都唔例外，縱然杜域侯活取得「雙雙」17分及11籃板，但其餘主將統統啞火，陶告魯9射1中只得3分、代替尼爾遜正選領軍嘅杜漢4射1中同得3分，結果魔術今場只係入得69分，近6場有3次得分唔過「7字頭」，令打得唔好嘅76人照樣有得贏。

格芬（左）入樽當食生菜，今仗又交足功課。（美聯社圖片）
  • 格芬（左）入樽當食生菜，今仗又交足功課。（美聯社圖片）

4連敗嘅魔術近期唔係得分低，就係被對手炒鑊甘，教練雲根迪賽後都承認球隊出現空前危機，並會盡快搵出問題力求止瀉。眼見球隊咁羞家，杜域侯活都準備就緒跳船另覓東家，「魔獸」接受《芝加哥論壇報》訪問時流露欲加盟公牛嘅意向：「如果上帝會讓我同戴歷羅斯一齊打波嘅話，相信這事會發生，我非常欣賞羅斯仔，而且佢係我嘅好兄弟。」

格芬騷料 爆年度靚「樽」

而早前有指因「魔獸」與羅斯嘅贊助商相同，因而令贊助商出手阻止佢選擇公牛，不過「魔獸」已否認此事，似乎真係好事近。

快艇「入樽王」格芬昨日面對雷霆時作出了一記反地心吸力單手入樽，被網民譽為年度最佳入樽，就連寸爆嘅「大帝」勒邦占士都點名力讚格芬：「他是No.1，我只是阿二！」快艇今仗亦以112比110挫雷霆。