【本報綜合報道】近年唔少NBA名將退休後都傳出「唔掂」，其中「AI」艾佛遜近日就被爆出拖欠一家珠寶商款項多時，被法院判定該珠寶商可以從艾佛遜嘅銀行賬戶中，強制獲得86萬美元（約670萬港元）賠款以及訴訟費和律司費。
其實近年已數度傳出艾佛遜經有財困問題，主要因為AI近年喺NBA冇班落，前排去土耳其打波又因傷被球會提早解約，坐食山崩搞到仙都唔仙吓。今次單料係美媒《TMZ》從法庭記錄中，查出一家珠寶商早在2010年時入稟控告艾佛遜拖欠款項37.5萬美元（約290萬港元）。
由於AI兩年來從冇就單案件作出回應，故法庭直接判AI敗訴，並強制從佢戶口中扣除近86萬美元作出賠償，當中包含訴訟費同律師費。
對於當打時嘅艾佛遜嚟講，86萬美元只係「散紙」而已，但依家佢老人家冇嘢撈，兩年以來都找唔掂筆數，似乎「壞孩子」真係好手緊！如果AI真係如此潦倒，倒不如放低身段，跟同樣盛傳財困嘅「二哥」柏賓拍住上，齊齊打吓元老賽幫補吓好過啦！