阿聯年薪縮水8成
【本報綜合報道】已落實加盟衞冕冠軍小牛嘅易建聯，原來波糧大縮水，據《ESPN》透露阿聯年薪僅得77萬美元（約599萬港元），屬小牛全隊最低，比起佢上季在巫師嘅406萬美元人工更縮水約8成！不過阿聯隨即用表現證明身價，尋日在D-League大爆發取得「雙雙」29分及13個籃板，明天將會隨小牛作客出戰活塞，有望首度披起小牛9號戰衣。（周三早上8時30分開賽）
同魯域斯基差24.7倍
根據《ESPN》公布，易建聯今季年薪為771,706美元，在小牛全隊15名球員中人工最低，若與最高薪嘅隊友魯域斯基比較，兩人薪酬足足相差24.7倍。事實上，阿聯人工的確大縮水，由07年登陸NBA開始，阿聯首四季年薪為277萬、298萬、319萬及406萬美元，從未試過有一季低過七位數字美元，如今人工仲差過當年新秀賽季，都算坎坷。其實阿聯未落班前，其經理人一直希望為佢爭取到一紙600萬美元年薪合約，可惜阿聯受傷後乏人問津，亦因此而身價大跌。
明日或披9號衫征活塞
不過阿聯並冇自暴自棄，尋日佢繼續在發展聯盟打出霸氣，首節已極速入局9射8中攻入17分，而全場則狂飆29分，並交出13個籃板及4次助攻，美中不足係阿聯所屬嘅德薩斯州傳奇輸波。幸好阿聯表現已證明了狀態良好，所以小牛明早作客戰活塞，球隊已經預埋佢，屆時阿聯就有機會首度披上小牛9號戰衣，在今季常規賽初見球迷。