黃金寶車神學做凡人

人生的過程就是一個夢想接着另一個夢想。尚有3個多月，黃金寶就滿39歲了，究竟踩夠未？還要追逐單車夢嗎？「對啊，對啊！最近好多人總問我兩件事，一.幾時退休？二.擺唔擺酒？都答到麻木了！」面對退役，「阿寶」坦承非常矛盾，恍如身處十字路口：「同單車建立了太長時間的深厚感情，我好享受掛住塊號碼布，四圍去比賽的感覺，都踩足20年了，要一下子放下，好難，亦好不捨！」

接觸社會　不易適應

「當然，我知道退役是必經過程，雖然這一步行得較慢，也帶點猶豫，但『已經掹起咗隻腳喺半空』，差在幾時鼓起勇氣踏出去！」黃金寶重申，單車生涯中「得多過失」，也從未覺長年漂泊，與家人朋友聚少離多是一種犧牲：「香港只是彈丸之地，做人做事都應該放遠一點，外面世界好大，機會亦較多。對我來說，為夢想離開家園，冇問題；即使訓練比賽時天氣凍、爬上山、曬傷手腳甚至炒車，也不是最難克服的，反而接觸社會，遇見權力鬥爭及公平利益時，才讓我心靈受到創傷，有時要『屈』一段時間始能平復。」

沒錯！社會就是殘酷的！「阿寶」自小轉做全職運動員，20年來只有「訓練，比賽，再訓練」，難免跟現實世界脫節，就連「日出而作，日入而息」這麼簡單的生活秩序也無所適從：「別看我一把年紀了，其實當運動員，一切都有人安排好，7點起身、7點半食完早餐、9點去練車……一旦冇人安排，超亂、好徬徨！晏晝打電話來，可能我還未瞓醒呢！哈哈哈……」尷尬笑聲背後，着實多麼無奈。

做番正常人　為退役鋪路

昔日的黃金寶，永遠是「今晚返（港），聽朝走」，直至近一、兩年，教練沈金康開始「放手」，讓愛徒自行決定去留時間表，因為「老沈」知道「阿寶」自律，也希望他有更多「做正常人」的機會，為退役鋪路。上個月，「車神」便回港放了兩個多星期假「叉電」，出席慈善活動，見見朋友拍拍拖，還跟媽媽、家姐、細佬走到老家沙田歎茶享天倫。「阿寶」說今個假期特別Enjoy，皆因學識「點做凡人」：「前兩年都試過放假，嘩！返到屋企勁攰，瞓到十一、二點，都不知食早餐好還是食Lunch好，跟住踩踩車，渾渾噩噩就過一日，覺得好浪費時間。」

「今次情況截然不同，就算教練冇為我安排，生活大小事情自己都能夠Handle，作息時間正常，感覺好充實，開始熟習轉換了角色，搵到節奏。我會諗，有天停下來不再踩車，跟住搵工，相信好快就可以適應『普通人』這個身份吧！」

細佬結婚冇衝擊

展望人生另一階段，黃金寶雙眼像會發光：「好憧憬、好興奮！好想知往後會遇到甚麼新挑戰，好想做自己想做的事。無論前路有多崎嶇，我都會如踩車一樣，用最樂觀和積極的態度奮勇向前；所以嘛，大成就不敢說，但要賺個飯盒錢應該OK！」

「車神」聖誕節冇假放，但年底會返港出席細佬婚禮（12月30日），問「阿寶」可會受到「衝擊」？「冇喎！他早就話結啦！」又是一貫「黃金寶式耍太極」避談感情事。那麼會留港度大除夕嗎？「未知，看情況，最驚影響訓練……」

這一刻，單車依然排在黃金寶生命裏的第一位！

圖／文：李芷韻、Maggie