波總紀律委員會早前宣判放生陳七，遭網民鬧爆指波總維護球證權威而犧牲公義，遇襲還手嘅飛馬外援杜特當場領紅牌就停賽兩場。事件雖告一段落，但最近一場荷蘭盃，性質比陳七事件更嚴重，荷蘭波總卻推翻球證判決，再度引起網民討論。
該場星期三舉行嘅荷蘭盃係阿積士對阿爾克馬爾，上半場阿積士領先一比○嗰陣，有個懷疑醉酒球迷衝入場內，向阿爾克馬爾門將艾華拉度襲擊，艾華拉度自衞還擊，結果畀球證出示紅牌驅逐離場，此判決引起阿爾克馬爾不滿，教練華碧克為保護球員生命安全，決定拉隊離場，同時向球證趕艾華拉度出場嘅誤判以示抗議。
呢件事嘅爭議點比陳七事件更尖銳，更加審死官，艾華拉度打人喎！梗要紅牌啦！阿爾克馬爾拉隊離場嘅後果亦嚴重得多，球證亦唔係判錯，但佢咁判就唔公道。
荷蘭波總反應快，星期三出事，星期五已有判決，就係撤銷艾華拉度嘅紅牌，指佢喺毫無準備下遇襲，考慮埋佢情緒受影響而還手，所以取消佢張紅牌。
至於阿爾克馬爾拉隊離場抗議，案情比較複雜，荷蘭波總仲未決定係咪重賽，還是依照賽事腰斬前阿積士領先一比○為最終戰果。
有時球迷嘈可能係為啖氣，但更多時係見到唔公道至會出聲，所謂公道自在人心，荷蘭波總嘅判決值得波總反思。
波男