今日聖誕節，Peter在此恭祝大家聖誕快樂、新年進步！今年香港球迷真有福，除咗傳統拆禮物日英超開快車，期待已久嘅NBA新球季亦會在香港時間拆禮物日（周一凌晨）正式開鑼，首日賽事好戲連場，多支爭標熱門包括小牛、湖人、熱火、雷霆等都會亮相，由於大部分球隊開操僅僅十數天，備戰時間較倉卒，再加上常規賽場數減少，所以要預測冠軍誰屬目前仍是言之尚早。
個人覺得今季NBA有兩支球隊要留意，第一支係東岸奪標熱門熱火，熱火上季組成三巨頭衝冠失敗，教練史普斯達為加強球隊團結性，季前特別周遊全國，向國內其他團體運動隊伍偷師，希望能營造隊內良好氣氛。另一支值得留意嘅球隊係快艇，快艇今季加入基斯保羅、比立斯後實力大增，論星味雖然不及同市宿敵湖人，但勝在實際，除有機會威脅湖人喺洛杉磯嘅一哥地位，隨時會成為西岸一大黑馬。
英超方面，大部分球隊會在聖誕、新年快車應付四場聯賽，除咗人強馬壯嘅曼城，相信好多領隊都會採用輪換制，間接令失分機會大增，聯賽榜經過呢段時間隨時大執位，令下半季爭標形勢更加引人入勝。
金句：聖誕快樂！拆禮物日香港球迷更快樂！
黃興桂