八年了，唔經唔覺自稱為「The Chosen One」真命天子嘅「大帝」勒邦占士，經歷八季始終未能做到天命所歸，登上籃球之巔一嘗NBA總冠軍滋味，歸根究柢都係畀佢嘅狂妄性格所累。幸好碰釘八季嘅「大帝」終於知錯，季前虛心求教傳奇中鋒奧拉祖雲，學習失傳已久嘅「夢幻步法」，誓要變得更強，先稱霸東岸，再一圓總冠軍夢。
勒邦占士上季不惜背負「叛徒」之名，離開母會騎士轉投熱火，與韋迪及保殊合組「超級三巨頭」。可惜此舉不但未能為「大帝」添上冠軍指環，仲因此而成為眾矢之的，上季總決賽就因為熱火太過乞人憎，令小牛多了不少額外支持力量，一鼓作氣「滅火」！
再度與總冠軍擦身而過，終讓「大帝」明白性格改變命運嘅道理，佢趁停擺期間收起一貫目中無人嘅性格，首先乘私人飛機拜會史上最靈活中鋒奧拉祖雲，希望學識後者嘅「A」，在籃底下變得更從容，占士亦係繼高比拜仁及「魔獸」杜域侯活之後，第三位求教奧拉祖雲嘅球星。
占士並冇在停擺期內出外打波「搵銀」，反而不斷與幾名兄弟韋迪、基斯保羅等組織慈善明星賽，既能為餓波球迷止咳，又可以做善事助人，的確為「大帝」爭番唔少分數。預計占士嘅壓力已較上季小，加上「三巨頭」浸咗一季已大大加強默契，實力無疑屬東岸最強。
稍能威脅熱火嘅相信只得上季常規賽冠軍公牛，公牛為解決得分後衞積弱嘅問題，季前簽入「排骨仔」咸美頓，呢位老將除可以幫輕戴歷羅斯得分之外，亦會為年輕嘅公牛帶來經驗，絕對係熱火爭奪東岸冠軍最大屏障。
至於近年均入過總決賽嘅塞爾特人及魔術，未見有驚喜新血，料難有突破，反而紐約人搶走小牛奪冠功臣贊特拿，「內線三巨頭」實力可怕，有望突圍。