夏達威火併柏賓洛文
「美國傳奇球星亞洲之旅－澳門站」今天強勢開波，前魔術名將「Penny仔」夏達威將領軍出戰由柏賓、洛文助陣的另一方隊伍。於香港擁眾多球迷的「Penny仔」今次訪澳全程Nice爆，每次面對記者均保持開朗笑容，相比同樣擁有高人氣的柏賓和洛文則唔多騷記者，後者昨日練波更玩失蹤，似乎未打先輸人心！
為備戰今仗，一眾「名叔」昨日都有練波，亦和在場的澳青籃球員見面。身形、技術皆無走樣的「 Penny仔」練射波時盡顯昔日風采，49歲火箭「滑翔人」德斯拿射術亦依然精湛，其餘眾星都士氣如虹 ，預料今仗激戰可期。不過，主角之一洛文一直未有露面，態度有欠認真，至於另一巨星柏賓，前晚落船後並無理會記者提問，昨日練波亦是「畀面」現身，影完大合照後即急急離開。
Penny仔澄清復出傳聞
相反Penny卻「識做」得多，記者提問、合照、簽名統統冇問題，對於去年傳他復出NBA的報道，他就加以否認：「我自問體能仍很弗，但重出江湖機會不大，但如果我能夠打，希望能為熱火効力。」
除這場經典對決外，半場休息亦設入樽賽，今個賽事和夏達威同隊的Air Up There11 ，必殺技是720度轉體入樽，大家拭目以待。
賽事知多啲
日期：12月18日（周日）
時間：下午6時（1場表演賽、入樽賽）
地點：澳門威尼斯人度假村金光綜藝館
票價：$580至$3,280
購票：快達票及通利琴行，或上網www.cotaiticketing.com
記者Billy、Kin澳門直擊