香港隊聘請Ernie Merrick（梅歷）擔任總教練一職，波男同好多球迷一樣相當期待，單從履歷睇，梅歷執教經驗相當豐富，以佢嘅級數相信有能力教好港隊，但最重要係波總同各甲組隊，能否配合港隊嘅備戰計劃，同埋真係畀多啲時間佢慢慢執隊波，如果唔係搵莫連奴嚟教都冇用啦！
香港近年搵外籍教頭，無論係彭利萊抑或利沙雲，都係嚟咗冇幾耐，櫈都未坐暖就走，好似彭利萊咁，玩完個曼谷亞運就被飛，而利沙雲帶隊時間耐啲，但都係得一年貨仔到，教練咁快走人，無非係因為波總「筆直」唔夠，見成績冇乜起色，就唔肯再揼錢。
不過，波男認為呢個係非常短視嘅做法，因為一個成功嘅代表隊教練，係需要時間慢慢建立風格，同埋搵合適嘅球員，以香港成日攞嚟比較嘅新加坡為例，佢哋近年國際賽成績比香港突出嘅原因，就係因為個教頭阿拉莫域教咗隊波已有八年時間，球隊多年來都貫徹着同樣風格，隊波自然夾得熟啲。
波男知道現今足球非常現實，交唔出成績就要炒魷，但香港嘅足球環境比較特殊，外人嚟到需要多啲時間適應，既然今次有政府「射住」重金禮聘到澳職冠軍教頭梅歷，就應該畀多啲時間佢發揮所長，千祈唔好虎頭蛇尾，一年半載又話易帥，咁只會攞啲錢嚟嘥嘅啫！
波男