Elke推右走左玩謝師傅
球愛敢死隊出動！體育版「優質雄性動物」接受號召，組成一支史無前例兵團，走訪娛樂圈及各界靚女，講吓佢哋對波的感受，當中有愛情、奇情、癡情……乜情都有，務求要你讀完之後愛到死為止！
提起o靚模組合冬甩，大家一定諗起性感少女，一幀幀火辣比堅尼寫真，簡直係宅男恩物。新成員陳芷敏（Elke）走清純路線，但佢外表斯文，對運動就好open，最叻跳舞、打羽毛球，今次第一次踢波亦展現驚人體育細胞，一招「推右走左」舞到拿仁暈咗喺度，真係叻女！
Elke今年21歲，可謂青春無限，學習能力梗係高啦，第一次揸起個波，踢落當然有啲生手，但拿仁教踢波都幾個月，有我呢個好教練喺度，學生「上腳」當然快啦。「推右走左」呢招，除咗腳法要好之外，仲要識把握時機，動作又要靈活，速度梗係要快啦，Elke體育細胞超勁，又話頭醒尾，好快就將拿仁玩弄於股掌之上，轉個頭仲要向師傅我整個V字手勢，唔係見你咁Cutie，肯定好好教訓你！
世界女唔Like壞孩子
踢波有姿勢有實際，平時有冇睇波學嘢先？「其實我唔係成日睇波，世界盃時屋企人睇，我又學吓睇，但唔係好有心裝載囉！」睇你個款，都係鍾意睇靚仔啦！「哈哈，我唔係好鍾意靚仔o架咋，特別憎啲自以為好有型嘅男生，我覺得男仔最緊要品格好囉，如果場上又茅，私底下又沙沙滾，個樣幾靚都冇用啦，係咪先！」估唔到Elke人仔細細，對個世情睇得咁通透，真係要畀十個Like你。
落場踢完波，就考吓你做主播掂唔掂先！拿仁今次搵咗段馬納當拿同比利嘅新聞稿考佢，雖然Elke年紀輕，唔知兩大球王係乜水，但經拿仁稍為解釋後，Elke喺鏡頭前將佢哋兩個嘅恩怨情仇講得頭頭是道，呢位小妮子真係天生食呢行飯嘅。
圖／文：司徒子文、麥馬拿仁