國泰航空香港國際賽為一年一度馬壇盛事，愈搞愈成功，有位商界老友同主辦單位有交情，畀咗成張枱佢，波男亦獲呢位老友邀請，可以舒舒服服入會員席，坐低食自助餐兼睇馬，一個字講晒：爽！
講到馬，自然冇波咁耍家，但波男亦晨早做定功課，仲問定啲對國際馬有研究嘅人士攞料，點知由第一場輸到重頭戲一哩錦標，見到告仔隻加州萬里捧走全日大獎（但自己冇買），都係時候返屋企食飯囉！
馬王忠之前啲料全部唔得，點知到我走咗嘅第九場，佢畀嘅超皇鷹、金獅名將就跑入位置Ｑ，派近四百蚊，唔係你財唔入你袋，就係咁解囉！
輸錢還輸錢，波男依然好Enjoy，因為現場氣氛真係好鬼正，本地薑鬥外地名駒，作為香港人，唔買馬都要打氣，所以當見到香港馬成績甚佳，特別係蔡明紹貼欄後上如飛，捧走香港盃，波男嗌到喉嚨都沙埋，大鑊過英格蘭捧世界盃。
香港國際賽馬同國際七人欖球賽，唔單止係香港體壇，已昇華為香港嘅國際盛事，對提升香港國際地位貢獻良多，但號稱最受香港人關注嘅足球，又點呢？
講起上來，真係唔好意思，聽到明年賀歲波參賽係南華、廣州富力、日本清水心跳，以及南韓城南一和，現實一啲講句，呢個戲碼削削哋。諗番以往，賀歲波曾經盛事一件，入場人數二至三萬好閒事，爆棚亦無數次，氣氛唔差得過賽馬同欖球。
點解依家愈搞愈謝？究竟係冇錢定冇橋，定係兩樣都冇呢？若然係兩樣都冇就大件事，快啲搵能人異士幫吓手喇！
波男