雖然同屬歐洲盃賽，但歐聯、歐霸根本不能相提並論，無論榮譽、獎金都差天共地。歐聯係歐洲最頂級盃賽，每場賽事全球觀眾數以億計，獎金、轉播費更屬天文數字。歐霸只屬次級賽事，單以決賽一場計贏波獎金不過係300萬鎊（約3,600萬港元），大牌勁旅視為雞肋，球迷睇波意欲自然唔高。
歐洲聯賽冠軍盃（前身為歐洲冠軍球會盃）歷史悠久，奪標隊伍被封為真正歐洲最強，等同球會級世界盃。參賽隊伍粒粒皆星，各地電視台均爭購直播權，轉播費當然愈扯愈高。獎金方面，去年曼聯奪亞軍，歐聯總獎金亦高達４億鎊（約48億港元）。歐聯根本就係金礦，頂級球會、球星為名為利當然搏晒老命，賽事吸引，睇波球迷自然多。
歐霸盃賽球隊，只係各地頂級聯賽三至五名不等及足球弱國冠軍，星光暗淡，即使喺淘汰賽加入歐聯分組賽嘅第三名球隊，嗰啲「降格兵」都冇爭標心機。早前歐聯出局後，曼聯領隊費格遜就話踢歐霸係「懲罰」，而熱刺老帥夏利列納就話，歐聯分組賽出局球隊唔應該轉踢歐霸，明顯覺得係嘥時間。歐霸獎金少、榮譽低，大會落到去亦未必夫添應戰，認受性低好多。