曼聯衫價兩極化

據統計，全球曼聯球迷約有3.3億人，亞洲球迷數目便有2億，曼聯波衫每季都有穩定銷路，著名球衣網站《footballshirtculture》統計05至09年數據顯示，曼聯與皇馬每年賣出120萬至150萬件波衫位列榜首，雖然實際球衣銷量被球會列作商業機密，但曼聯波衫係全球銷量最高球衣之一亦不難估計。

傑斯歐霸衫啱收藏

港人至愛嘅曼聯淪落歐霸，球衣店亦要「變陣」，Oku坦言：「一件曼聯短袖歐聯版波衫原本索價1,199元，長袖1,259元，拆開計算係曼聯波衫短袖售價499元，長袖559元、一對歐聯章500元、印字200元，如今歐聯分組賽出局，印在波衫上嘅歐聯章再無意義，大概會減4、500元。」

曼聯降格踢歐霸，Oku亦已引入一批歐霸章，但售價竟與歐聯章睇齊，他指出：「曼聯甚少踢歐霸，加上今季好多歐聯傳統勁旅都降格歐霸，間接令歐霸章貨源緊張。」他笑說：「這件歐霸波衫除了曼聯球迷，對於收藏家亦有一定吸引力，例如歐霸章再印上傑斯名字，真係有今生冇來世，估計炒味甚濃。」

由於曼聯踢歐霸戰意難測，成績難以估計，因此Oku對波衫銷量亦不敢寄望過高，反而希望曼聯在英超要爭氣：「歐聯開波時間在凌晨3、4點，相隔至少兩星期才有一場，歐聯及歐霸波衫銷量不會太高，反而英超才是主要市場，每星期有波打，晚上10至11時比賽，聯賽成績好，波衫銷量便有保證。」

曼市雙雄嘅歐霸版波衫，喺Milla演繹下仍然充滿激情！

放大圖片

反紅魔fans買曼城衫贈興

波衫銷量與聯賽成績掛鈎，今季在港最暢銷波衫，就係現時排英超榜首嘅曼城，採訪之時，一位正在店舖內購物嘅球迷搭嘴：「曼聯今季處處碰壁，聯賽畀曼城壓住、歐聯及聯賽盃出局，足總盃抽籤又撞正曼城，隨時四大皆空，嗰班買曼城波衫嘅人未必真係捧曼城，可能係專同曼聯作對嘅球迷都唔定呢！」

圖／文：黃兆崑、司徒子文

特別鳴謝：自由球