歐國盃出現死亡B組！世界盃亞軍荷蘭、德國、葡萄牙及丹麥被編入B組，四支球隊世界排名喺頭十一位，為出線一定打甩脾。兩個主辦國以波蘭抽得好籤，只同希臘、俄羅斯及捷克同組，英格蘭則同法國、烏克蘭及瑞典同屬D組，出線形勢不俗，揭幕戰波蘭對希臘將於明年六月八日上演。
歐洲足協喺抽籤前，特別向上周自殺嘅史必悼念致敬，B組實力最接近，兩支前冠軍德國及丹麥大把恩怨，加埋世界盃亞軍荷蘭及有基斯坦奴朗拿度領軍嘅葡萄牙，場場都係大戰。
衞冕嘅西班牙則抽得好籤，同意大利、愛爾蘭及克羅地亞同屬C組，出線難度不高，另一支球迷至愛英格蘭出線主要對手係法國同瑞典，主辦國烏克蘭只能做陪襯。
另外，歐洲足協正計劃，減少西歐各國8強及4強嘅門票分配，每個國家即使入到淘汱賽階段，只會分到5,000張門票，同以往場館座位嘅兩成唔同，受影響嘅包括西班牙、英格蘭、葡萄牙、法國及德國等。
歐洲足協解釋，由於烏克蘭同波蘭基建及交通未必可以應付到咁多球迷，而且多個國家即使入到淘汱賽階段，根本未必有咁多球迷會去睇波，所以決定寧願留番啲波飛畀烏克蘭同波蘭嘅國民。