沙排女王請你食波餅

今期「球愛敢死隊」嘅嘉賓，相信係最有運動天分嘅一個，佢就係港隊「沙排女王」江卓儀Sonia嘞！排球英文叫做Volleyball，可以用身體任何一部分去打，所以江卓儀平時練波手腳並用，球技自然有番咁上下，佢嘅獨門絕技係乜？當然係窩利（Volley）啦！

向偶像巴迪高學習

江卓儀話打排球雖然主要用手，但有時救波唔理得咁多，腳都會照用埋，至於乜嘢係窩利？咪即係球不落地，直接凌空抽射囉！其實窩利同打排球嘅道理都係一樣，最緊要唔好畀個波落地，掌握好時間，大腳一抽就搞掂！

唔好講咁多，第一part武鬥就考吓Sonia嘅窩利功夫有幾多斤両，Sonia雖然較早前打排球受傷，拍攝當日要紮住上陣，但即席示範幾腳，竟然腳腳七注力度驚人，好彩樂比仔避得切，唔係聽食波餅都得嘞！問Sonia點解咁勁揪，佢話係學佢偶像巴迪斯圖達，唔怪得知似模似樣啦，原來係搵巴迪高拜師學藝，問佢點解鍾意巴迪高，佢話巴迪斯圖達除咗好波之外，仲夠忠心喎。估唔到Sonia揀球星都有自己一套。

Sonia支持法國隊，所以特登着件法國新作客波衫，同列貝利及拿斯尼做隊友。

同樂比堅尼對談，傾波經講近況，相當投契。

武鬥就考完，當然嚟到文鬥啦，江卓儀成日睇波，仲知道樂比堅尼出晒名貼士準過人，今次一場嚟到，話要挑戰吓我喎！好！就搵兩場嚟緊周中舉行嘅歐洲國家盃外圍賽畀你分析吓啦！睇吓你係咪真係咁識波先！

歐國盃撐法國復興

Sonia老實不客氣，即刻揀咗場丹麥對葡萄牙，認真識貨，呢場係H組榜首大戰，今場勝負對出線形勢好關鍵，Sonia話C朗同拿尼都咁弗，重要關頭肯定會嚟料，睇好葡萄牙作客照贏！另一場法國對波斯尼亞，佢話雖然對波斯尼亞唔太熟悉，但重組後嘅法國表現唔錯，樂比仔就覺得佢講得頭頭是道，不如大家上on.cc睇吓佢有冇資格踩過界做埋足球評述員啦！

圖：司徒子文