本地波醞釀重新起飛，雖然比賽水平一時三刻難以大幅提高，但將賽事重新包裝係指定動作，最近又有建議仿傚英超舉辦每月最佳球員選舉，做球員嘅試問邊個唔想攞獎，此提議波男當然要舉腳贊成啦！
做球員其實有時同做歌手差唔多，係好需要獎項去鼓勵同予以肯定。
好多人話搞選舉要講認受性同公信力，其實睇你點睇啫，有獎就係有獎，冇獎就係冇獎，有陣時豬肉獎都大把人搶，每到年尾翻開娛樂版，就係啲一線歌手爭豬肉獎鬥攞得多嘅新聞，你唔好理係乜獎，總之你肯搞就有話題，就有人關注。
聽聞醞釀中嘅每月最佳球員選舉可能會鬧雙胞，收費電視台同體育傳媒都有意舉辦，其實呢啲選舉最好就各有各搞，你選你嘅每月MVP，我選我嘅No.1，獎項嘅野永遠都係寧濫莫缺，球員獲獎後影張相，講吓得獎感受，提升曝光率，咁對球市、球迷同球員都係好事！唔知球壇幾時至會出現「勁波金足」或者「叱咤波壇榜」呢類頒獎禮呢吓？
波男