同仁哥 談談情講講波
Vanessa、Icy同Janelle本季正式成為大埔Babies，識咗冇耐已經鬼死咁friend，未埋位就吱吱喳喳大談化妝經，都唔使問佢哋會唔會爭妍鬥麗鬧不和啦！大埔真係冇搵錯佢哋，一問鍾意邊隊波，3位姐姐第一時間答係大埔！咁外國波又點呀？
Vanessa：我鍾意德國隊！我係舊年世界盃開始真正睇波，我覺得佢哋好有隊形，我嗰排成日同班朋友約埋睇直播，去到4強輸畀西班牙，我真係down足成日架！球員我就鍾意費蘭度托利斯，佢去咗車路士後，我就唔再鍾意利物浦嘞！
Icy：我唔鍾意啲粗魯嘅球員，最憎佢哋喺場上吐口水，真係好肉酸呀！我鍾意啲有品嘅，好似朗拿度呀、碧咸呀，就係我杯茶。雖然我都知朗拿度出晒名成日沙沙滾，但我唔理佢私生活係點啦，總之踢波嗰陣斯文就得。
Janelle：我嘅波齡最長。我06年世界盃就開始睇波，球會最鍾意嘅當然係當今最強嗰兩隊巴塞隆拿同曼聯啦！球星方面就鍾意卡卡同美斯，又犀利又靚仔，可惜佢兩個嘅球會同國家隊雙方都係死對頭，冇機會睇倒佢哋同場合作。
