盞鬼DaDa黐得厲害

球愛敢死隊出動!體育版「優質雄性動物」接受號召,組成一支史無前例兵團,走訪娛樂圈及各界靚女,講吓佢哋對波的感受,當中有愛情、奇情、癡情……乜情都有,務求要你讀完之後愛到死為止!

今期《球愛敢死隊》犀利嘞!Billy有幸請到「宅男女神」陳靜(DaDa)大駕光臨!DaDa係萬千男生嘅「女神」,都唔知幾多麻甩佬都幻想有個咁索嘅女朋友,而DaDa就話自己一啲都唔黐身,但黐波就最叻,認真盞鬼,即管等我Billy會一會佢,睇佢過唔過到文鬥同武鬥呢兩關先!

小學時代係運動健將

08年憑住「百果園」廣告一炮而紅嘅DaDa,出道以來就有「咪神」稱號,咁究竟擁有天使面孔、魔鬼身材嘅陳靜,到底同足球有乜瓜葛呢?唔講唔知,DaDa睇落弱質纖纖,但查實佢係小學羽毛球同田徑校隊,而隨住去年出席咗幾個世界盃活動,DaDa已經成為咗愛波之人,間唔中仲會約埋班Friends齊齊睇英超,鋪睇波癮分分鐘勁過你同我。

陳靜樣靚身材正,擺甫士拍寫真同廣告就話引死我哋班麻甩佬啫,但如果你以為DaDa得個樣咁就大錯特錯嘞!拍攝當日小記一見到DaDa就知佢識波,皆因佢一手就拎起件阿仙奴主場波衫大讚夠復古,又話戥兵工廠輸畀曼聯2比8好可憐,證明佢跟得幾咁足。

首着波砵10分鐘畢業

訪問當日DaDa首次着銻粒波砵,佢話感覺同着高踭鞋差唔多,所以擺起甫士上嚟完全No Problem。雖然DaDa平時冇乜幾可踢波,但估唔到佢足球天分咁高,當Billy想考考佢識唔識黐波,佢仲問:「係咪用膠紙黐架?」

豈料DaDa扮豬食老虎,當Billy即場示範完後,「女神」已急不及待拎起個波跟住學,唔使10分鐘已經黐到個波貼貼服服,唔講真係以為佢係女足成員。有姿勢有實際仲要一點就明,唔怪得DaDa喺娛樂圈撈得咁掂啦!

圖:司徒子文