姚明退休後可以歎世界，以其身家，想做乜都得。最近佢上中央電視台，首度擔任評述嘉賓，講乜？當然係籃球，唔通講足球咩！
姚明今次係為央視講亞洲籃球錦標賽，以其黃金級卡士，當然係受到舉國籃球迷關注。賽後對其評價，仍然係正面居多。第一係姚明向來形象良好，深得球迷歡心，對其處子講波，自然會多多包涵。第二係姚明講波一如其打波風格，雖非天賦英才，但勝在夠勤力，付出一百零一分，事前做足準備，刨熟有關資料，所以雖無超級驚喜，但大家亦收貨有餘。
究竟姚明今次客串做評述嘉賓，會有幾多酬勞，據內地傳媒所講，係五百元人民幣。係，大家冇睇錯，五百元人民幣！
當然，以姚明身家，絕不會在乎做嘉賓酬勞，若然佢大哥冇興趣，畀佢五百萬亦費事睬你。但睇見此酬勞，卻令人擔憂中國體育節目評述水準，唔能夠超英趕美噃！
此話何解？帶大家睇睇ＮＢＡ評述嘉賓酬勞，前火箭教練雲根迪同ＥＳＰＮ簽訂一份價值六百萬美元五年合約，因此推掉不少球會任教邀約，寧食安樂茶飯。作為ＴＮＴ頭牌評述嘉賓，前太陽巨星巴克利年薪亦達一百萬美元，不少退役二線球星，亦可以搵到六十萬至八十萬美元之間嘅評述工作。
美國電視台這種崇尚專業，鼓勵退役球星加入競爭嘅機制，保證美國電視台體育評述工作，始終保持高水準。中國體育產業發展迅速，市場有的是資金，要電視體育評述工作跟上大環境，迎合更專業、更高端化趨勢，加薪係唯一途徑。
波男