黃婉曼Chok西掂檔

今期《求愛敢死隊》輪到我法比加輝出場，會一會「天氣女神」黃婉曼！前兩期「出征」嘅名家樂比堅尼同麥馬拿仁一向憐香惜玉，見到靚女就軟晒，但我加輝出名係一條硬漢子，唔會咁易畀挑戰者嘅美色所迷惑，想喺我手上攞高分？真係要食過吓夜粥兼有番咁上下足球知識，接招啦，Icy！

Icy黃婉曼以前喺「三色台」報天氣，一句「我哋一齊跳出香港」而成為「天氣女神」，搞到宅男們死唔少細胞。成名之後，Icy踏咗半隻腳入足球界，做過世界盃主持人，如今就不時喺now節目度畀足球貼士觀眾，其中西甲同意甲更係Icy最熟嘅聯賽，全因為西、意波比英超更講求地面組織，唔會成日踢到飛沙劈石，可見Icy確係一名懂得享受足球嘅球迷。

化身C朗射罰球！擺波	立正	拉西

悟性高好快學識

睇波就有板有眼，但踢波呢？Icy話自己平時真係好少踢波，但就一直都有心想學，因為依家喺now《撳錢》，好多時都會同觀眾講起「波經」，所以佢覺得若然係識踢波嘅話，肯定會更快知道觀眾講乜，起碼甚麼「七旋斬」、「腳趾尾拉西」等足球術語一講就明，仲可以搭到訕。好，咁我呢位「罰波專家」今次就一於教你呢兩招技倆。

其實Icy都知道「七旋斬」係「萬人迷」碧咸嘅招牌武器，但最初教佢嘅時候，就唔多識運用腳內側位「Chok西」，只係蠻力一腳踢走個波。幸好Icy悟性夠高，講兩三次已經知道「Chok西」真諦，亦慢慢踢出有旋轉力嘅波，絕對係我執教生涯上領悟力最高嘅學生，只要佢再多加練習，相信唔難成為「港版女碧咸」。至於另一招「腳趾尾拉西」，Icy就仲快上手，不過女士們一定要着鞋踢啦，如果唔係好易踢爆你哋啲水晶甲架！

圖：司徒子文