西甲專家撐開早場
話晒都係半個「西甲專家」，Icy都同加輝講，好期待今季西甲賽事，事關為咗遷就亞洲球迷，今季西甲首度開設早場，就如香港時間今晚六點，now會播超早場貝迪斯對馬略卡，而十點就有桑坦德對利雲特，西甲狂迷肯定開心死！
事實上，香港球迷之所以熱衷英超，部分原因係開賽時間大多喺周六、日晚上，大部分球迷可以視睇波為放假最佳節目，自然受歡迎。反觀過往西甲大多都係凌晨時分開波，亞洲球迷唔會個個願意捱眼瞓睇波，人氣自然不及英超。
今周推介貝迪斯主W
Icy表示：「今季就唔同啦，西甲早場有六點同十點，球迷既可以食住飯睇波，又可以視西甲為飯後甜品，或者同一班friend出去飲杯嘢欣賞球賽，總之就畀到球迷多一個選擇！」
而Icy亦為今周早場賽事作出推介：「我知道貝迪斯係今季升班馬，能夠升班，實力應該唔會差得去邊，加上又有靚仔球星辛達告魯斯坐鎮，我一於貼佢哋擊敗馬略卡，打響今季主場頭炮！」