莫帝出巡搵A貨

莫連奴一早話唔會出席下午訓練後記者會，唔畀面到極，但原來佢自己去行街，似乎對下屬就嚴自己就鬆喎！「寸王」朝早九點半就出發去白雲皮具城行街，白雲皮具城有多個商場，入面格局有啲似香港旺角中心或信和之類，而話明叫皮具城，最多當然係皮具啦，但最出名係賣A貨，上次莫帥帶國際米蘭去北京都去過秀水街，似乎佢特別鍾情中國山寨名牌商品市場。

粉絲追影相 叫保安閂門

莫連奴行商場行到皇帝出巡咁款，原本冇乜人認得，後尾愈來愈多粉絲追住佢影相。佢同教練團轉去另一個商場，佢立刻閂埋商場玻璃門，示意保安不要讓球迷進入，但佢最終空手而回。「寸王」離開皮具城後，就去了酒店旁邊嘅天河城，在商場亦做成哄動。

玩足一個上晝嘅莫帥，下晝就主持於廣州嘅第一課操練，吸引近萬名球迷去到天河體育場，門券每張一百元人民幣。訓練歷時一個半小時，經過半小時熱身後，進行一個小時分隊練習賽，C朗及卡卡各帶住一隊比賽。

訓練以C朗最搶鏡，每次觸球都惹來fans尖叫及歡呼，佢亦交足貨，頻頻於練習賽插花、快爆落底及射波，仲入兩球，睇到班球迷如癡如醉。練習完後，球員仲射咗四個波送畀球迷，卡卡、卡斯拿斯及沙治奧拉莫斯臨離開時向球迷揮手道別。