沙比女fans多過C朗

皇馬靚仔球星多的是,邊個最受歡迎呢?C朗?卡卡?錯晒!根據小記現場觀察,型佬沙比阿朗素至係女球迷首選,有利物浦女粉絲以身犯險混入皇馬球迷堆,無非為見沙比一面,認真癡情!

紅軍女fans追隨沙比

皇馬抵達廣州後,好多人以為C朗同卡卡最多fans,原來沙比阿朗素都唔小嘢,小記見到有女球迷身穿利物浦波衫混入皇馬fans群,仲夠膽死拉埋「You will never walk alone」標語,非常出位。沙比近期拍住碧基登上足球遊戲FIFA12西班牙版封面,足見佢人氣夠晒勁!

另外,巴西球星卡卡亦有大量女粉絲,佢行去邊都有人大嗌Kaka,更有唔少姐仔喺小記身邊高呼「哎呀!帥慘了!」或「好『令』仔呀!」等語句。C朗之前於機場黑晒面,令球迷對佢印象麻麻。