C朗攰爆黑面唔騷fans
萬眾期待嘅皇家馬德里昨晚抵達廣州，吸引逾千名球迷到場接機，令新白雲機場恍如變成巴拿貝球場，但天王巨星基斯坦奴朗拿度（C朗）經過連場熱身賽後，疲態盡現，全程冇厘神氣，黑住面口冷待fans。反觀另一位星級大將卡卡貫徹親民作風，展示招牌微笑，冧盡「粉絲」，人氣先勝C朗一仗！
卡卡親民贏盡人心
皇馬將於周三同廣州恒大（馬會稱為FC廣州）踢熱身賽，原本昨日下午五點半到埗，但因航班延誤，至昨晚7點15分先至到埗。大批公安早已嚴陣以待，當球員陸續步出出境大堂，雖然首兩位現身球員只屬大後備，但已令全場起哄，跟住沙比阿朗素、比比及卡斯拿斯先後出現，爆發第一浪高潮。
其後教練莫連奴登場，第2浪高潮隨之而來，球迷大聲歡呼，可見「寸王」魅力不下於天價球星。第3浪高潮輪到卡卡出場，雖然佢近年受傷患困擾，少有上陣機會，但人氣並冇下跌，歡呼聲震天，佢不忘以招牌鄰家男孩微笑及揮手回應，非常之Nice。據小記打聽，原來卡卡曾經拍攝過一輯中國喉糖廣告，喺內地形象非常入屋，知名度比C朗有過之而無不及，加上佢今次表現親民，進一步加分。
4公安全程貼身保護
全場氣氛最高峰當然係C朗登場，有高級公安貼身保護呢位巨星，並有4名公安為佢開路，相當架勢。在場千人一齊好有節奏大叫「Ronaldo」，但C朗神態疲倦，頻打呵欠，黑口黑面垂頭直行，完全唔理會球迷，然而卻無減fans熱情，爭相追住佢，部分圍欄更被推倒，幸好公安終於安全護送C朗上車，希望C朗經休息後，可以最佳狀態示人補番數啦！
