法比仔快閃擺明離廠
阿仙奴（香港）足球學校13名學員，昨日正式進入英國Sparsholt College，準備接受總校安排嘅特訓。不過上堂之前，佢哋率先拉隊入場睇酋長盃學吓嘢先。雖然極有可能離開兵工廠嘅隊長法比加斯只係做觀眾，但無損學員熱情，佢哋現場見到卡路士韋拿、艾沙維同艾朗藍斯等球星嘅精彩演出，相信已經學到幾招絕技傍身。
現場睇波學嘢
自從雲格執教阿仙奴後，堅持Play the Arsenal way，即係崇尚進攻、短傳入滲、高速盤球，兵工廠無論係一隊、預備組、女子隊、各級青年軍以至各地足球學校，都堅持踢出悅目足球，香港嘅阿仙奴足球學校亦獲「兵工廠」提供官方訓練課程，例如一些趣味反應遊戲、小球練習等，都貫徹雲格理念。學校今次暑期訓練營嘅口號正係「學習踢出阿仙奴華麗風格」。
拍定告別短片
趁住阿仙奴正舉行一連兩日嘅酋長盃賽事，眾學員前晚乘機「踩場」偷師，可惜兵工廠隊長法比加斯因傷缺陣，小兵們均無緣同佢見面。事實上，有英國傳媒便發現法比仔喺半場已提早離開，並指佢已拍下向兵工廠球迷告別嘅短片，睇嚟離隊事在必行。
雖然法比仔未有上陣，「兵工廠」亦被小保加逼和2比2，但一眾學員大開眼界之餘更有唔少得着。另外，與新星宮市亮同樣來自日本嘅齊藤雄一本來都想喺前輩身上偷學嘢，可惜宮市亮卻因未辦妥工作證無緣登場。