雖則話食在廣州，不過皇馬眾星來到五羊城，飲食方面都好小心，球會已經下令球員唔准食海鮮，並有一名私人廚師隨團負責球員三餐，所有調味料自備，認真細心。
安排今次訪華行程嘅負責人哥連斯話皇馬今次有一名西班牙廚師隨團，逗留中國期間他將會指導其他中國廚師烹調適合球員口味嘅菜式。
皇馬今次係入住位於天河城新開業的粵海喜來登酒店，樓高33層，皇馬全體75人將包起其中3層，普通房每晚約一千八百元人民幣，一般球員都係住呢種，C朗等巨星有冇特權升級，主辦單位就唔肯講。皇馬入住期間，酒店亦特別加強保安，大門口兩側均設有兩排水馬阻隔，出入口都有至少3名保安把守。