全城圍捕費托林伯泰利追星200小時Action！

巴克萊錦標賽3路大軍陸續抵港，由昨日布力般流浪已率先殺到，至阿士東維拉31日晚離港，期間約200小時內，全港將會掀起一股追星熱潮。除咗酒店同球場，究竟班球星會去邊呢？我哋集結官方公布活動、小道消息以及歷來外隊訪港經驗，統計出埋身指數，大家認真要做足功課，睇吓點樣搵費蘭度托利斯及林柏特影相同簽名喇！

埋身指數：****

機場接機，埋身機會雖較低，但球隊離開時點都要喺離境大堂作短暫停留。據過往經驗，呢個空檔曾有唔少fans「突襲」成功。另球隊逗留喺酒店時間長，只要耐心啲去捕，斷估唔會食白果。當然入球場睇波同觀操嗰陣時都有不俗嘅埋身機會。

埋身指數：*****

維拉訪港期間有兩項公開宣傳活動，如明日下晝喺旺角出席新球衣發布會時，將會就係大家嘅黃金機會嘞！另佢哋31日又會出席雙魚星號一個關愛兒童活動，球迷到時可以喺登船處見到佢哋。由於係做宣傳，對fans會寬鬆好多，埋身機會接近100%。

埋身指數：****

車仔主將林柏特、施治、費托同沙洛文卡勞周二會喺樂富車路士訓練學校「藍球場」出席訓練班，非學員雖然唔可以入場，但球迷亦可試吓喺球場外嗌吓佢哋，如果唔係要簽名，只想見吓偶像身影，可考慮去附近山頭或墳場從高處下望，因距離唔遠，大聲嗌佢哋實聽到。

埋身指數：?????

英超球星鍾意飲番杯，故蘭桂坊、Dragon-I、Volar等夜蒲點相信係佢哋夜晚嘅蒲點，撞星機會高達8成。另大會通常都會安排佢哋試吓香港地道美食同睇景點，4年前紅軍就遊覽過山頂同去香港仔珍寶海鮮舫晚膳。仲有另一必備節目就係買影音電器，因此酒店周邊嘅大型電器店都唔可以忽略。

至於加連威老道紋身舖則係另一熱點，球星要喺香港紋身留念，都一定會嚟，碧咸、高比拜仁同勒邦占士都幫襯過。仲有係人都知泰利係英超賭神，如果撞啱佢突然癮起，包架直升機想過大海玩兩手，你隨時有機會同佢喺賭枱過招o架！

全城圍捕費托林伯泰利 追星200小時Action！