「葛女郎」Phoebe真人騷！
前幾日我哋《東方體育》介紹咗競賽級嘅「香港Wakeboard女王」容昊雯（Alice），隨即有唔少女讀者來電查詢點先可以好似佢玩滑水玩到咁型！其實大家咪以為滑水好難，原來即使係平日唔做運動又唔識游水，一樣可以滑得好掂，翺翔水面爽到震！唔信？今集就請咗「葛女郎」Phoebe（許穎）示範點樣由「運動白癡」變做「Wakeboard達人」啦！
玩Wakeboard（花式尾波滑水）有幾潮？淨係睇吓一班走在潮流最前線嘅藝人余文樂、張栢芝、李璨琛等都鍾意玩就知啦！最近因寫真宣傳片被YouTube列為「十八禁」，而人氣飆升嘅「葛民輝Icon女郎」Phoebe，自言乜嘢運動都唔鍾意。
做運動怕粗手粗腳
但Phoebe唯獨愛玩滑水咁話：「我係完全唔做運動嘅人，因為會搞到粗手粗腳！有肌肉嘅腳好難瘦o架，影相唔好睇，所以平時好少郁。不過，好奇怪嘅係我淨係鍾意滑水！可能係因為喺水入面好涼快又唔辛苦，滑起嚟仲要幾型吓添！」
各位唔好以為Phoebe平日唔做運動，又唔識游水，學玩Wakeboard一定好困難，但原來啱啱相反，佢係一Take過學識：「我起初以為要識游水先可以玩，原來只要有救生衣同埋有教練睇住就OK；但其實我都唔知點解自己第一次玩就成功起到水，就係因為呢份滿足感，令我好想繼續滑囉！」
女仔唔鬥力易上水
採訪當日擔任Phoebe教練嘅香港代表白居廉Julien，就解釋女仔學玩Wakeboard會易啲上手：「可能啲女仔會有誤解，見到玩Wakeboard要畀隻艇拉住，就一定要好大力先玩得。但其實啱啱相反，女仔唔夠力先容易入門，因為最初嘅『起水』動作，精要之處就係唔好同隻艇鬥力，所以女仔玩Wakeboard反而仲着數。」Julien就話依家女仔玩Wakeboard都好普及，有啲仲會約埋五、六個老友一齊出海玩番兩個鐘，除番開每人都係夾兩百幾蚊（每小時收費約七百元），都幾抵玩架！
圖／文：司徒子文 鳴謝：Island Wake（28950022）