Alice Wakeboard逐浪青春
夏日碧海藍天，係玩水上活動嘅好日子，香港hit咗多年嘅Wakeboard（花式尾波滑水）經已殺入上班族同OL界，全港三甲之一嘅女將容昊雯（Alice），正職係玩具營業員，一出海面踏上滑浪板就唔得了，Alice話Wakeboard嘅精髓係夠Cool夠型，呢啲咁正嘅玩意，個個都想玩啦！
大約十年前香港開始有人玩Wakeboard，興咗幾年後，從未玩過運動嘅Alice喺一次西貢遊船河，發現同行嘅表哥竟然係Wakeboard高手，自此Alice亦愛上乘風破浪，一玩五年，成績位列全港三甲，並成為運動品牌Island Wake代言人。
夠Cool夠型 練埋好身材
現年卅歲、充滿健康氣息嘅Alice表示：「第一次見到人玩Wakeboard就超鍾意，之後每逢星期六、日會出海玩番夠本，開始玩咗兩個月，終於首次成功離開水面兼順利着陸，之後更加欲罷不能，連冬天都要着保暖衫落水玩。」
講到玩Wakeboard要訣，Alice以專家口脗講解：「Wakeboard係一種好有型嘅運動，重點係訓練身體嘅『平衡力』，我哋每個人都有一隻『蠢腳』，即係當你向前走路，如果右腳行先，左腳就係你嘅『蠢腳』，Wakeboard係要令『蠢腳』變成靈活。」
Alice同香港一般上班族一樣，星期一至五要應付繁重工作，每年仲要到外地出席玩具展覽會，但一到星期六、日同假期，就會同朋友出海玩Wakeboard，由於佢做嘢有交帶，老闆同事知道佢喺Wakeboard界闖出名堂，都大表支持。
日子有功，Alice練就一副健康而苗條嘅運動員身形，現時佢正勤於練習頗高段數嘅「凌空轉體」動作，向更高難度挑戰！