早前有單新聞話由於2022年卡塔爾世盃氣溫太高，為球員健康着想，竟然有人建議將九十分鐘賽事分成三節，每節踢三十分鐘咁話，呢單笑料一度成為茶餐廳熱話，不過波男向好嗰方面諗，若然國際足協（FIFA）真係改制，香港隊都幾有計！
七月嘅卡塔爾氣溫超過四十度，就算起個冷氣球場都未必頂得住，一位負責興建球場嘅工程師建議，不如將場波分成三節嚟打，初時以為佢講笑，點知國際足協竟然並冇即時否定，咁即係話，呢個建議有得諗！
咁就掂啦，我哋香港足球多年來一向自認技術唔差，只係體能唔夠人哋好，如果可以踢三十分鐘抖一抖，真係香港球員之福，到時莫講話同日韓拗手瓜，衝出亞洲挑戰列強都仲得！
波男建議波總不妨博一博依家就推出「進軍卡塔爾十年大計」，連聯賽都改成三十分鐘一節，以香港球員嘅體能，應該會適應得好好！不過，對於廣大投注人士嚟講，以後玩「半全場」就比較煩惱，因為再唔係開「和主」、「客主」呢啲，而係要諗多一瓣例如「和和主」、「主客主」，真係難搞咗好多囉。