希爾辣興華拉迪米爾

一場重量級拳賽周日凌晨在德國漢堡上演,擁有IBF及WBO冠軍嘅烏克蘭拳王華拉迪米爾,火併WBA冠軍英國拳王希爾,勝出者就係重量級拳賽嘅王中王。拳手賽前挑釁係平常事,但希爾竟然用希特拉嚟玩就太過分,此事已激起華拉迪米爾怒火,呢場拳賽實有睇頭!

用希特拉揶揄走投無路

希爾08年之前係輕重量級拳手,其後進身重量級拳賽,09年擊敗俄羅斯拳手華洛夫奪得WBA寶座,但佢得罪人多稱呼人少,過去曾出言侮辱華拉迪米爾係「騙子」同「母狗」,今次對戰之前仲用希特拉嚟玩,真係離譜。

話說喺星期三,希爾將一段關於希特拉嘅電影片段放上社交網站,呢段片原本係講述希特拉走投無路嘅最後幾日,但就換上配音話華拉迪米爾今場拳賽輸硬,極盡挑釁。由於希爾嘅行為太過踩界,搞到英國拳擊機構介入調查,向希爾發出警告。

華拉迪米爾嘅訓練員聲言,今次一定要好好教訓希爾,並做足準備,包括研究希爾嘅比賽影帶,研究對方「hit-and-run」打法,希望可以搵出弱點施予重擊。

外國博彩賠率顯示,華拉迪米爾勝出賠率為1.62倍,希爾勝為2.38倍,和局為34倍,華拉迪米爾贏面較高。