雖然Jeana並非運動狂熱分子，但佢喺即將上演嘅《熱浪球愛戰》中打沙灘排球有板有眼，絕對唔似門外漢。據Jeana所講，係因為佢哋成班演員，跟咗協恩中學「冠軍教頭」林鎮國學打波三個月，就即刻似模似樣：「之前我從未打過沙排，頂多係讀書時放學後同啲同學喺操場搓吓排球嗰隻。今次為咗部戲就跟林Sir學打波，雖然每次都曬足大半日，但拍出嚟畀觀眾睇到啲動作夠自然、夠專業，乜都抵番晒！」
對於自己曬黑咗好多，Jeana就話仲好：「曬完之後覺得自己肌肉結實咗，成個人健康咗，仲有埋古銅色皮膚，着衫都型啲啦！我建議依家啲年輕人多做運動，唔好成日匿埋唱K同打機。」
