仲有三年就係2014年巴西世界盃舉行之日，國際足協日前發炮，批評巴西組委會籌備工作進度緩慢，直指巴西「冇球場、冇機場」，要求巴西盡快搞掂佢！
其實類似嘅批評聲音，喺南非世界盃舉辦前都經常聽到，相比之下南非嘅情況更加嚴重，但去到臨開波一切問題都解決晒，呢啲咪就係船到橋頭自然直囉！
巴西國民睇波狂熱程度爆錶，可以想像三年後嘅賽事氣氛將會係史上最癲，主隊實力強勁更加唔使多講，主辦國有咁好條件，但國際足協仍然「阿芝阿佐」，即係明玩巴西嘅啫！
由08年獲得主辦權到正式比賽，巴西只得六年時間籌備，要求一個發展中國家喺咁短時間內搞咁多大型基建，巴西話搞得掂你都唔信啦。
至於實際情況亦唔係想像中咁差，巴西叫得做足球王國，點會冇球場呀？之不過國際足協認為，巴西現有場地唔符合佢哋眼中嘅標準，佢哋要求嘅場地必須國際現代化、交通方便、資訊設施完善，樣樣要最頂級。
機場、道路同鐵路嘅建造，涉及國家經濟同龐大經費，係社會民生大事，香港機場起唔起第三條跑道，都要向公眾諮詢啦，點可能國際足協班大帝一句話「冇機場」就起到畀你。
國際足協當日決定將個主辦權交畀巴西，其實應該做好心理準備會搞一屆「冇球場、冇機場」嘅世界盃，否則的話，每屆賽事都畀晒啲先進國家主辦，咁咪唔使煩囉！
波男