星爺徵婚！埋嚟喇！
「星爺」想成家立室！今年三十而立嘅曼聯球星朴智星，係眾多女球迷夢寐以求嘅鑽石王老五，佢昨日旋風式出席香港三個公開活動時，坦言有結婚打算，更列出擇偶條件，曼聯女球迷要留意喇！
南韓球星朴智星昨出席本港舉行嘅三個活動，先喺上晝出席now寬頻電視記者會，再現身中環hmv簽名會，之後到尖沙咀曼聯餐廳同球迷共進晚餐，連趕三場下仍全程保持笑容，冧盡傳媒和球迷。
有求必應冧爆fans
呢位好好先生對球迷冇得彈，簽名合照有求必應。「星爺」接受本報專訪時有問必答，即使感情事亦絕不避忌。說到被「星爸」催婚，他笑言已跟爸爸溝通過，自己暫時未有壓力，但絕對有成家立室想法。朴智星表示：「有另一半會令我更有動力，而且咁樣先會令我成為一個『perfect man』！」
至於擇偶條件，「星爺」則簡單開出「要在發展足球事業上照顧到我最好」一個條件，未知之前曾與他傳出緋聞嘅「冰上精靈」金妍兒，甚至曾傳過婚訊嘅前南韓國家隊主帥許丁茂愛女係咪合佢心意？
除感情事外，「星爺」最令人關心當然是用不完的鐵人體能，說到小時候飲青蛙汁進補的經歷時，「星爺」就笑到見牙唔見眼。被問到今次來港，會否有膽嘗試鱷魚肉等中國滋補食品時就稱：「哈哈，小時候飲過媽媽的青蛙汁，老實說，青蛙汁超難飲，所以我已毫無興趣再試這些奇奇怪怪的難吃食物！」事實上，來去匆匆的朴智星，昨晚已飛回首爾和家人團聚，莫講話食好嘢，連shopping亦坦言冇時間！
34、5歲先諗退休
近日，當了六年紅魔鬼的朴智星，與熱刺、西甲西維爾、馬德里體育會連上關係。為球隊上陣一百七十七次射入廿四球的「星爺」，直言明白要在曼聯留効，少點努力都不行，自己仍會以球隊第二十度奪取聯賽冠軍為目標。
前隊友史高斯轉任教練，已從國家隊退役的「星爺」也有透露未來掛靴計劃：「我對他們二人在新範疇發展充滿信心，至於自己則暫打算踢到卅四、卅五歲左右，然後重返校園修讀與體育有關的課程。」