董方卓同魔唔同命

球圈好現實，小董離開曼聯後，粉絲們已經唔記得有呢個人。雖然星爺大小董四年，但其實小董喺○四年已經畀費Sir睇中，比星爺加入曼聯時間仲要早一年，費Sir簽佢後立即外借去比利時，立心栽培成材。

「星爺師兄」淪落阿美尼亞

記得○五年曼聯訪港，新加盟嘅星爺同特別從比利時歸隊嘅小董一齊亮相，小董仲喺香港取得「士哥」，但可惜當年佢年紀仲細，又唔係常規國腳，辦理英國工作證有唔少困難，未能繼續同星爺並肩作戰。

小董之後遭遇唔使波男再多講，佢加入曼聯咁耐，喺英超只踢過一場正選，○七年五月曼聯已經提早封王，佢正選落場對車路士，但可惜表現未如理想，而小董亦難逃被「叮」命運。

星爺喺中環賣ＤＶＤ，小董又做緊乜？離開曼聯後，佢返咗內地踢中超，今季再戰歐洲喺葡超搵食，但都撈唔掂，近期去咗阿美尼亞碰運氣。

波男