盧均宜公然撐南華
幾年前嘅一句「我唔會加盟南華」，再加上今屆以隊長身份帶領傑志破壞南華聯賽冠軍夢，相信盧均宜已成無數「擁南躉」頭號公敵！不過，呢位「反南Icon」今晚就會着起「南華衫」撐南華，令唔少擁南躉「O嘴」；但均宜所撐嘅南華並非足球隊，而係打入咗甲一聯賽Playoffs總決賽嘅南華籃球隊，原因係佢要幫舊校友「同級生」李劍煌打氣！
採用五場三勝制嘅甲一籃球Playoffs總決賽，今晚將會喺灣仔修頓室內場上演第一回合戰事，由衞冕嘅永倫出戰南華。前者仍保持全勝紀錄，而南華今屆就已經三次輸畀對手，所以論戰績同埋近態，真係有啲距離！
不過，南華今晚就有位身份尷尬兼特殊嘅fans撐場，佢就係足球界「擁南躉」嘅頭號公敵盧均宜！原來呢位傑志隊長喺常規賽已入場撐南華，佢解釋話：「嗰次係我第一次入場睇甲一籃球，目的係幫南華嘅李劍煌打氣。仲記得我讀緊中一已經識佢，不過就同級唔同班，當時佢打籃球、我踢足球，可以話係裘錦秋中學嘅兩大風頭躉！今年傑志贏南華場甲組波佢都有嚟支持我，所以依家甲一咪支持番佢囉！」
傑志粉絲打對台
講到自己嘅身份嚟撐南華會唔會好尷尬，均宜就話冇問題：「我入到場都係球迷，唔會諗咁多！最搞笑嘅係上次場波，有啲傑志fans原來係永倫球迷，當日我就同佢打對台，真係幾得意。」平時畀人嗌加油就多，對於初嘗做fans幫人打氣，均宜表示今晚會再Encore：「真係好熱鬧又有氣氛，上次之後我應承咗阿煌Playoffs會再嚟過，今晚一定唔會甩底！」
對於得到「反南Icon」支持，李劍煌就話自己都有差唔多經歷：「仲記得今屆傑志對南華場關鍵戰，我身為『南華球員』但就去支持均宜。最後南華輸咗，我都唔知畀乜嘢表情出嚟好！」
雙雄會Playback
18/3銀牌賽 永倫69:60南華
26/3銀牌賽總決賽 永倫79:73南華
20/5常規賽 永倫88:71南華
今日賽程
時間 賽事 對賽球隊
7:00pm 季軍戰 飛鷹Vs福建
8:40pm 冠軍戰 永倫Vs南華
地點：灣仔修頓室內場
票價：$50、長者及學生$30
門票於5:00pm開始發售，每人限買5張
圖、文：司徒子文