芸羽求自由盼獲電輪椅

「阿妹細細個已經識行，但芸羽淨係識爬，帶佢睇醫生先證實有呢個病！」沈母憶述，當年年僅一歲的芸羽不論行動或學習能力均比孿生妹妹遲緩，未料原來與患上大腦麻痹有關。患病後，芸羽四肢軟弱無力，需以輪椅或助行架代步，日常生活亦靠家人照料。芸羽深知母親辛勞，凡能力所及的都會努力去做，「沖涼一定要人幫手，不過我識煮公仔麵！」兩母女談起生活點滴，笑言雖苦但亦樂在心頭。

六年前沈母攜妹來港，芸羽則留在鄉間由祖母照顧，但因行動不便而曾停學近五年。「嫲嫲日日孭住我返學，直到升中嗰年因為學校太遠，嫲嫲行唔到，所以就冇返學。」直至兩年前，芸羽來港後入讀香港紅十字會雅麗珊郡主學校，才得以重拾課本，故十分珍惜學習機會，「好想有一日讀到大學，但依家先中二，好驚太大個升唔到！」

想去海洋公園睇海獅

芸羽猶記得剛來港時，對新環境感到又新鮮又好奇，但礙於雙手無力，無法自行推動輪椅，故甚少外出。訪問期間，芸羽雀躍地問記者香港的好去處，「香港有啲乜地方好玩㗎？我想去海洋公園睇海獅！」可見小妮子渴望自由，「有部電動輪椅就唔使人推，可以自己出街、返學，唔會畀人覺得我似怪物！」

物理治療師指出，芸羽因病引發痙攣及影響下肢活動能力，建議以電動輪椅代步，以助患者投入社交生活。有關輪椅需費二萬五千元。小妮子的夢想能否成真，有賴善長踴躍捐輸。

捐款編號：12118

記者 蕭智湲

代郵

陳港生家人：本報接獲讀者捐款以示慰問，請致電3600 9988與記者馮先生聯絡，以便處理善款事宜。