Lulu秘技「黃金寶」大法
夏天到嘞，女士們準備好熱褲同小背心抵擋炎夏未呢？不過，着住小背心但腰纏「車胎」就唔好睇啦！為咗拯救各方好友，本報請嚟幾位身形弗爆嘅Fit Babies，無間斷咁介紹Keep Fit貼士，等大家踢走「車胎」！負責打頭陣嘅係熱爆本地足球壇嘅「大埔Lulu」董嘉儀，呢位「大食妹」成功保住條廿三吋纖腰，原來係靠「黃金寶」大法，真係要學吓嘢啦！
最勁一餐四個公仔麵
咪睇Lulu細細粒，個樣又可愛到爆，其實佢好大食！最高紀錄就試過一餐食四個公仔麵都面不改容，食量仲勁過唔少「大隻仔」！不過，奇就奇在呢個「大食妹」食極都唔肥，由年頭到年尾都保得住條廿三吋纖腰，佢就話都下咗唔少苦功：「大家唔好諗埋咁多不勞而獲嘅方法啦，因為想Fit就一定要做帶氧運動！其實我同一般城市人一樣，放咗學或者做完嘢返屋企都已經好攰，又唔想再出街做運動，惟有喺屋企『做機』啦。好彩依家啲健身器材好多都係簡單摺合式易於收藏，如果唔係有三千呎大屋都唔夠放啦！」
健身單車玩法樂趣多
咁多種健身器材，Lulu最鍾意踩單車，仲自己幫佢改咗個名叫「黃金寶」Keep Fit大法：「點解叫『黃金寶』？因為我一諗起踩單車就諗起佢囉！我鍾意踩健身單車係因為方便，想輕鬆啲可以一個鐘踩9公里就消耗到250卡路里，想搏命啲減肥就踩21公里，就減到650卡路里，隨自己喜好同決心！依家啲健身單車無論阻力、把手、座位高低都可以調校。向前衝又得、靠住椅背睇住書踩都得，有啲仲可以放埋部手提電腦喺上面，一邊踩一邊上網，要Fit真係好容易。」
不過，Lulu就提醒大家踩單車要不時換姿勢：「如果長時間固定喺一個動作，會令腰部肌肉緊繃僵硬。換吓姿勢不但可練到唔同肌肉，亦唔會因姿勢一直固定而造成腰椎負擔。」
圖／文：司徒子文 場地鳴謝：Fitboxx