鵝頸橋下最啱「打小人」，而喺青馬橋下最啱打乜嘢？梗係打沙灘排球啦！採訪當日為咗拍攝效果，所以揀去麗都灣沙灘排球場取景，貪佢有條青馬大橋同汀九橋做背景襯托，喺度打波簡直好View又好Feel！
但原來喺細問之下，先知道呢個「沙排聖地」被康文署以重開泳灘為由，正擬將兩個沙排場拆除。阿Cat對此大表可惜：「青馬大橋係香港宏偉建築嘅地標，打個比喻就好似喺巴黎鐵塔或者羅馬鬥獸場前面打波一樣，咁嘅Feel仲可以喺邊度搵？況且，喺香港嘅沙排場真係買少見少，政府又話支持體育，依家就走嚟拆場，真係唔知佢想點？」阿Cat仲話呢幾年多咗好多人打波，尤其夏天假日就一定人頭湧湧，要打波「跟隊」真係會等到中暑架！