奧運夢何價？窮到燶！沙排烈女吳天麗
「窮」相信有九成九嘅香港人都唔想！但偏偏就有個準大學畢業生吳天麗（阿Cat）為咗一個沙灘排球，毅然放棄晒所有嘢，仲利用自己積蓄去追逐「奧運夢」！一直過着「窮到燶」運動員生涯嘅阿Cat，甚至試過出外比賽冇錢返屋企……捱得咁辛苦都係為夢想？生活喺香港呢個拜金主義嘅地方，大家領略到幾多呢？
「好想快啲快啲離開香港，真係窮到唔想講嘢……」呢個係阿Cat早前喺自己facebook嘅留言，佢仲話代表香港出外比賽，起碼有膳食供應，唔使擔心冇飯開！小記就心諗「使唔使窮到咁呀？」
趁後生擁抱理想
不過，原來呢位「窮女子」喺一年前絕對唔窮：「中學時都會發吓夢做運動員，但為咗去新加坡讀大學就決定放棄！不過，就喺大學臨畢業要交最後報告前，我睇電視見到世界沙灘排球賽，嗰時我就諗『我點解唔可以』，就係呢股衝動，我掉低咗一張畢業證書、一份等緊我嘅設計工作……決定返香港試多次沙排夢！」吳天麗明白到「現實」呢兩個字，但又覺得要爭取奧運入場券，若年紀再大啲就會無機會，所以應該趁仲後生去盡力做，至少將來唔會後悔！
已經廿三歲嘅阿Cat，總唔可以日日「攤大手板」問屋企攞錢；亦由於自己經常到外國比賽，想做排球教練都唔得：「我相信冇一間學校會想請一個成日要請假嘅教練，依家惟有靠幫人頂幾堂嘅微薄收入，同埋前幾年讀大學時兼職積蓄，頂得一日得一日！」
用積蓄為港爭光
不過，由於總會冇資助，令吳天麗同佢個拍檔「阿Mei」黃婉媚，多次代表香港出賽都要自己畀錢買機票：「基本上係用緊積蓄嚟為港爭光！最難忘嘅係上次亞洲巡迴賽，我同拍檔接連參加泰國、印尼及越南站。點知去到最後嘅越南站竟然冇錢買機票返香港，要問朋友借錢返屋企。好彩最後喺呢個比賽攞到第七名、有七百蚊美金獎金，咁先可以還番錢畀個Friend。」阿Cat為咗夢想可以捱落去……但「窮」也要捱得有價值，你也有這目標嗎？
吳天麗 Cat Ng 小檔案
年齡：23歲
身高：1米65
體重：50公斤
10年亞洲巡迴賽咸寧站第5名
11年亞洲巡迴賽越南站第7名
11年女子沙灘排球邀請賽（淺水灣）冠軍
圖、文：司徒子文