大帝一沉百踩難救火

早前美國有小報爆料，指勒邦占士女友同巫師球星劉易斯有路，雖然劉易斯已經公開澄清，話根本冇咁嘅事，但已令「大帝」感到困擾，點知一波未平一波又起，有匿名球員向傳媒爆料，話勒邦占士性格傲慢自大，經常以「大帝」自稱，目中無人，可見勒邦占士嘅人緣甚差。

熱火翻盤機率19%

勒邦占士嘅低迷表現，亦被傳媒及名宿口誅筆伐，當中以前熱火及湖人球星拉斯最寸嘴：「柏賓話勒邦占士勁過米高佐敦，佢講嗰陣時一定係飲大咗，勒邦占士係優秀嘅球員，但距離偉大球星仲差好遠，等佢攞咗冠軍先再同米高佐敦比較吧，如果要揀一個最接近米高佐敦級數嘅球員，只有高比拜仁！」

就連目前任電視評述員嘅巴克利都為總決賽與專欄作者輸賭，若熱火最後獲勝，撐小牛嘅佢將穿上緊身泳衣到沙灘走一轉。

事實上，熱火目前嘅形勢相當惡劣，因為根據歷史，總決賽曾出現過37次落後2比3嘅局面，僅得7隊能夠喺最後兩場贏晒反勝，機會率得19%，換句話講，小牛奪標嘅機會高達81%。

本報綜合報道