「巨無霸」奧尼爾宣布退休後，有意向格鬥比賽發展，據UFC格鬥大賽總裁懷特透露，奧尼爾主動向佢提出，希望可參加終極格鬥大賽，若果成事，肯定令呢項賽事嘅吸引力大增。
懷特表示：「奧尼爾相當有誠意，佢喺宣布退休之前一星期，已經同我講想參加格鬥比賽，所以唔係一時衝動，佢話退休後會有好多時間，所以想好好利用。」
UFC終極格鬥大賽於1993年創辦，呢項運動喺美國、南美洲同日本甚受歡迎，若然奧尼爾加入嘅話，勢必全球轟動，懷特話成事機會甚高：「我同奧尼爾係好朋友，佢相當熱愛呢項運動，所以我認為佢加入嘅機會相當高。」奧尼爾雖然年紀唔輕又周身傷患，但咁大件，真係唔打得都嚇得喎！