公牛再負熱火危殆
常規賽MVP戴歷羅斯昨日又累街坊，羅斯仔在Game4表現持續低迷，起手27次僅8中，且在第4節尾段兩度「炒粉」，未能助球隊絕殺熱火，由英雄變成「毒瘤」！結果公牛在加時後以93比101不敵熱火，總場數落後1比3，再輸一仗就要提早放暑假。
起手命中率3成都冇
之前兩仗都「孭鑊」嘅戴歷羅斯，今場仍未能打出水準，續當「浪射王」！27次起手只入8球，命中率連3成都冇，3分球更係9射1中，瘋狂浪費機會，另又製造咗多達7次失誤。本應公牛今場可以追番場，可惜羅斯仔在第4節剩餘30秒時先後浪費兩個絕殺機會，包括最後時刻堅持單挑勒邦占士射失。熱火在加時憑韋迪及「大帝」爆發拋開分數，最終贏101比93。
今仗僅奪23分嘅戴歷羅斯賽後再一次為失準而道歉：「我嘅失誤實在太多，但我會從中吸取教訓，因為系列賽還未結束，公牛仍有機會取勝。」事實上除Game1外，戴歷羅斯近三仗都在水準之下，間接連累球隊輸波，所以佢每次賽後都為低迷表現道歉。
熱火方面，「大帝」勒邦占士繼續成為主角，今場除攻入35分外，仲交出6助攻、6籃板、3封阻同2搶截嘅華麗數據，成為贏波頭號功臣，Game5將在香港時間周五在芝加哥上演。
米克布朗接替禪師教湖人
湖人在今季季後賽行人止步，今夏首要任務就係要覓得「禪師」積遜接班人。據美國多個媒體報道，「紫金兵團」已經與「大帝」恩師、前騎士教練米克布朗達成協議，後者將與湖人簽約4年，合約總值1,800萬美元，不過湖人fans似乎唔多鍾意由米克布朗接手，紛紛喺網上表達不滿。
本報綜合報道